Nazir: Sosial müdafiə xərcləri 2026-cı ildə 9,1% artırılacaq

2026-cı ilin dövlət büdcəsində sosial yönümlü xərclərin əhəmiyyətli dərəcədə artırılması nəzərdə tutulur.  Bunu əmək və əhalinin sosial müdafiəsi naziri Anar Əliyev Milli Məclisdə büdcə müzakirələri zamanı deyib.

Nazirin sözlərinə görə, sosial müavinət, təqaüd və kompensasiyalar üçün gələn il 2 milyard 144 milyon manat ayrılacaq — bu, əvvəlki illə müqayisədə 178,5 milyon manat və ya 9,1% artım deməkdir.

Ünvanlı Dövlət Sosial Yardımı (ÜDSY) proqramı üzrə 465 milyon manat vəsait nəzərdə tutulub.

Haqqı ödənilən ictimai işlərin təşkili üçün 141,7 milyon manat ayrılacaq.

Əliyev əlavə edib ki, dövlət icbari şəxsi sığorta vəsaiti hesabına reabilitasiya vasitələrinin alınması üçün 31,7 milyon manat ayrılması planlaşdırılır.

Dövlət Sosial Müdafiə Fondunun investisiya gəlirləri və icbari sığorta vəsaiti hesabına şəhid ailələri və müharibə əlillərinin mənzil təminatı üçün 50 milyon manatlıq büdcə formalaşdırılıb.

Gülnar Nazimqızı