Aqrar Sığorta Fondu: Son iki ilin ən böyük sığorta ödənişi 1,1 milyon manat olub

Son iki ildə həyata keçirilmiş ən böyük sığorta ödənişi 1,1 milyon manat təşkil edib. Bunu Aqrar Sığorta Fondunun müşaviri Rəvan Səmədli Anews.az-a açıqlamasında bildirib.

O bildirib ki, ödəniş Ağcabədidə taxıl sahəsində baş verən sığorta hadisəsi ilə bağlı həyata keçirilib.

"2025-ci ildə ən çox sığorta hadisələri Ağcabədi, Ağdam, Xaçmaz və Tərtər rayonlarında qeydə alınıb. Ölkə üzrə ümumi statistika göstərir ki, zərər hadisələrinin sayına görə ilk iki yerdə Ağdam və Ağcabədi dayanır. Sığorta ödənişlərinin məbləği bitkinin növündən və onun inkişaf dövründən asılı olaraq dəyişir. Zərərin yekun məbləği müstəqil ekspertin apardığı ekspertiza əsasında müəyyənləşdirilir. Meyvə bağlarında məhsul yetişmədiyi hallarda ilkin ekspertiza aparılır və verilən rəyə uyğun olaraq hesablamalar həyata keçirilir", - müşavir vurğulayıb.

O əlavə edib ki, ekspertizanın müddəti bağın və əkin sahəsinin həcminə görə dəyişir. Daha böyük təsərrüfatlarda proses daha uzun çəkir.

Aytac Zeynalova