Netanyahu ölkə prezidentindən əfv istəyib

İsrailin Baş naziri Benyamin Netanyahu Prezident İsaak Hersoqa rəsmi şəkildə əfv müraciəti təqdim edib.Bu barədə “The Times of Israel” məlumat yayıb.

Bildirilib ki, Ədliyyə Nazirliyinin əfv şöbəsi nazirliyin bütün aidiyyəti qurumlarının rəylərini toplayacaq və sonra tövsiyələri hüquqi müşavirlərə təqdim edəcək.

İsrail prezidenti məhkəmə qərarı ilə məhkum olunmuş şəxsləri əfv edə bilər və çox nadir hallarda məhkəmə prosesi başa çatmamışdan əvvəl də əfv qərarı verə bilər. Bir şərt var ki, qərar yalnız ictimai marağa uyğun olduğu halda verilir.

Netanyahuya qarşı korrupsiya istintaqı 2016-cı ilin dekabrında başlayıb, 2019-cu ildə isə ona bir neçə korrupsiya işi üzrə rəsmi ittiham irəli sürülüb. Netanyahu ittihamları rədd edir. Noyabr ayında ABŞ prezidenti Donald Tramp Hersoqa müraciət edərək Netanyahunun əfv edilməsini xahiş etmişdi. Netanyahu isə bildirmişdi ki, əgər bu, onun günahını etiraf etməsi anlamına gələcəksə, əfv istəməyəcək.