Xankəndidə silahlı insident törədən Karen Avanesyanın məhkəmə tarixi açıqlanıb

Xankəndidə terrorçuluq və bir sıra ağır cinayətlərdə ittiham olunan Karen Avanesyanın məhkəmə iclasının vaxtı bəlli olub.

İş Gəncə Ağır Cinayətlər Məhkəməsinə göndərilib və hakim İlkin İbişovun icraatındadır. Hazırlıq iclası dekabrın 11-nə təyin edilib.

İttihama əsasən, Avanesyan sentyabrın 14-də evindən çıxaraq şəhər kənarındakı meşəlik əraziyə gedib və əvvəlcədən gizlətdiyi “Kalaşnikov” avtomatını, dörd sandıqça patronu və beş qumbaranı götürüb. Daha sonra bu silah-sursatla Xankəndidə keçirilən tədbirə yaxınlaşmağa cəhd göstərib.

Polis əməkdaşları ona mane olarkən Avanesyan üç qumbara ataraq və avtomatdan atəş açaraq silahlı müqavimət göstərib. Qarşılıq verildikdən sonra o, yaralı halda zərərsizləşdirilərək saxlanılıb.

Karen Avanesyana qarşı qəsdən adam öldürməyə cəhd, terrorçuluq, qanunsuz silah saxlama və hakimiyyət nümayəndəsinə qarşı zor tətbiqi maddələri ilə ittiham irəli sürülüb.