“Məhsəti”nin erotik təqdimatı qalmaqal yaratdı: Film festivaldan çıxarıldı

Mədəniyyət Nazirliyinin nəzdində fəaliyyət göstərən Bədii Şura “Məhsəti” adlı qısametrajlı bədii filmin Bakı Film Festivalında nümayişinə icazə verməyib. Qadağanın səbəbi filmdə klassik ədəbi irsə hörmətsizlik və obrazın təhrif olunması ilə bağlıdır. Bu barədə “Qafqazinfo” məlumat yayıb.

Şuranın rəyinə əsasən, rejissor və ssenari müəllifi Suad Qaranın təqdim etdiyi filmdə Məhsəti Gəncəvi obrazı etik və normativ çərçivələrə uyğun olmayan şəkildə təsvir edilir, şairənin mənəvi kimliyinə zidd səhnələrə yol verilir. Bildirilir ki, filmdə Məhsəti Gəncəvi “gəzəyən, əxlaqsız qadın” kimi təqdim olunur və bu, ədəbi irsimizin kobud şəkildə təhrifidir.

Qurum həmçinin filmdə manipulyativ təqdimatların, kontekstdən kənar mənalandırmanın və mövzuya uyğun olmayan mesajların yer aldığı qənaətindədir. Bu səbəbdən filmin lisenziyalaşdırılması və qeydiyyata alınması məqsədəuyğun sayılmayıb.

Nazirlik xatırladıb ki, Azərbaycanın görkəmli şairəsi Məhsəti Gəncəvinin irsi dövlət səviyyəsində qorunur və yüksək ideya-estetik dəyər daşıyır. Obrazın primitivləşdirilməsi və qeyri-adekvat kontekstdə təqdim edilməsi geniş ictimaiyyət tərəfindən də narazılıqla qarşılanacağı qeyd olunub.

Filmin müəllifi Suad Qarayeva – sabiq mədəniyyət naziri Əbülfəs Qarayevin qızı – Instagram hesabında paylaşım edərək təsdiqləyib ki, film lisenziya verilmədiyi üçün festival proqramından çıxarılıb. O bildirib ki, filmdə Məhsəti obrazını canlandıran aktrisa klub həyatına gedən, spirtli içki içən, rəqs edən və bir kişi ilə romantik münasibət yaşayan bir qadın kimi təqdim olunur.