Deputat: Süni intellekt cəmiyyətə sadə dildə izah olunmalıdır

Azərbaycanın süni intellekt (Sİ) strategiyası bütün sahələrə tətbiqi nəzərdə tutur, lakin bunun üçün cəmiyyətə mövzunun aydın və adi dildə izahı vacibdir.  Bunu Milli Məclisin deputatı Zahid Oruc parlamentdə  Milli Məclisin Təbbi ehtiyatlar, energetika və ekologiya komitəsinin “İqlim dəyişikliyi ilə mübarizədə süni intellektin rolu” mövzusunda keçirilən elmi-praktik konfransda bildirib.

Deputatın sözlərinə görə, Prezident İlham Əliyev dəfələrlə vurğulayıb ki, ölkə Sİ yarışında geri qalmamalıdır.

Zahid Oruc qeyd edib ki, süni intellekt Azərbaycanın yaxın tarixində real nəticələr verib və bunun ən bariz nümunəsi Vətən müharibəsində texnoloji tətbiqlərdir.

Deputat Sİ-ni “zəka sənədi” adlandıraraq bildirib ki, bu sahənin inkişafı üçün ilk növbədə əhali ilə düzgün kommunikasiyanın qurulması, mövzunu “sadə insanların başa düşəcəyi dildə” çatdıracaq kadrların hazırlanması vacibdir.

“Əgər bunu bacarsaq, Sİ-ni bütün sferalara tətbiq etmək mümkün olacaq və nəticələr daha təsirli olacaq”, – Oruc əlavə edib.

Gülnar Nazimqızı