Metodist üçün müraciət edən 5.000 müəllimdən 347-i seçilib

Metodist kimi 5.000-dən çox müəllim müraciət edib,  yalnız 347 nəfər metodist kimi seçilib. Bunu  Təhsil İnstitutunun direktoru səlahiyyətlərini müvəqqəti icra edən, Elm və Təhsil Nazirinin müşaviri Elnur Əliyev deyib.

O bildirib ki, yeni metodik dəstək sistemi məktəblərdə müəllimlərin peşəkar inkişafını gücləndirir

"Ölkə üzrə fəaliyyət göstərən metodist heyətinin əsas vəzifələrindən biri məktəbdaxili qarşılıqlı öyrənmə mühitinin təşkili və müəllimlərə birbaşa dəstək göstərməkdir. Metodistlər dərslərə birbaşa daxil olur, tədris prosesini birgə təhlil edir, inkişafetdirici tövsiyələr verir və müəllimlərlə birgə işləyərək real dəstək təmin edilir. Yeni model üzrə metodistlərin seçimi ciddi meyarlarla həyata keçirilir. Sertifikatlaşdırma imtahanından minimum 51 bal toplamış, həmçinin tələb olunan iş təcrübəsinə malik müəllimlər namizəd kimi qəbul edilir. Bu tələblərə cavab verən 5.000-dən çox müəllim müraciət edib, lakin yalnız 347 nəfər metodist kimi seçilib. Seçilmiş metodistlər 108 saatlıq ilkin təlim proqramı keçirlər. Daha sonra onlar Təhsil İnstitutunun Metodik Mərkəzi, baş metodistlər və peşəkar təhsil mütəxəssisləri tərəfindən davamlı olaraq dəstəklənir. 

Nazirlik rəsmisi bildirir ki, metodistlərin fəaliyyəti könüllü xarakter daşımır. Onların gördüyü işlərə görə əlavə əməkhaqqı müəyyən edilib və bu, müəllimlərin aylıq gəlirlərinin artmasına imkan yaradır.

Aytac Zeynalova