Azərbaycanın iqtisadi artımı 2025-ci ilin 11 ayında 1,6% olub - Baş nazir

Dünya İqtisadi Forumunun 2025-ci il üzrə “Qlobal Risk Hesabatı”nda qeyd olunan qlobal risklərə baxmayaraq, Azərbaycanın Ümumi Daxili Məhsulu (ÜDM) bu ilin on bir ayında  1,6% artıb. Bu barədə Baş nazir Əli Əsədov Milli Məclisdə çıxışı zamanı deyib. 

O bildirib ki, qeyri-neft-qaz sektorunda artım 3,2%, neft-qaz sektorunda isə 1,8% azalma qeydə alınıb.

İqtisadi artımın yavaşlaması əsasən neft hasilatının obyektiv səbəblərdən azalması ilə izah olunur.

Ölkənin strateji valyuta ehtiyatları ilin əvvəlindən 12,5 milyard dollar artaraq 83,5 milyard dollara çatıb ki, bu da manatla 142 milyard manata bərabərdir. Bu göstərici 2025-ci il üçün proqnozlaşdırılan ÜDM həcmini (130 milyard manat) üstələyir və valyuta ehtiyatlarını xarici borcdan 17 dəfə artıq edir.

Əsədov bildirib ki, “Moody’s” və “Fitch” beynəlxalq reytinq agentlikləri Azərbaycanın kredit reytinqini artırıblar. Bu, ölkədə iqtisadi dayanıqlığın, fiskal intizamın və əlverişli investisiya mühitinin səviyyəsini təsdiqləyir.

Gülnar Nazimqızı