Macarıstan iki il ərzində Azərbaycandan 800 milyon kubmetr qaz alacaq

Macarıstan və Azərbaycan arasında qaz tədarükünə dair saziş iki ili əhatə edir. Bu barədə Macarıstanın xarici işlər naziri Peter Siyyarto sosial şəbəkədə məlumat verib.

Onun sözlərinə görə, yeni müqavilə iki il ərzində ümumilikdə 800 milyon kubmetr təbii qazın alınmasını nəzərdə tutur.

Dekabrın 10-da SOCAR və Macarıstanın MVM ONEnergy şirkəti arasında yeni qaz tədarükü sazişi imzalanıb.

Şirkətin məlumatına görə, yeni razılaşma əvvəlki müqavilə əsasında hazırlanıb. 2023-cü ilin iyununda SOCAR və MVM CEEnergy 100 mln kubmetr qaz tədarükünə dair müqavilə bağlayıb və tədarüklər 2024-cü ilin aprelində başlayıb.

Məsələyə yaxın mənbə bildirib ki, 2026-cı ildə tədarük həcmlərinin 2024-cü il səviyyəsinə yaxın olması planlaşdırılır.

MVM Group “Şahdəniz” layihəsində 5% və South Caucasus Pipeline Company-də 4% paya sahibdir.

Azərbaycan hazırda 15 ölkəyə qaz ixrac edir; onlardan 12-si Avropadadır. Ölkə həmçinin Türkiyə, Gürcüstan və Suriyaya qaz tədarük edir.

2025-ci ilin ilk 9 ayında qaz ixracı 18,3 mlrd kubmetr təşkil edib. Bunun 9,4 mlrd kubmetri Avropaya, 7,3 mlrd kubmetri Türkiyəyə (o cümlədən TANAP vasitəsilə 4,3 mlrd kubmetr), təxminən 1,6 mlrd kubmetri isə Gürcüstana göndərilib.

N.Təbrizli