Amerikalı Xtellus bankı “Lukoil” aktivlərinin alınmasında favoritidir – Reuters

“Lukoil” şirkəti öz xarici aktivlərinin satışında amerikalı Xtellus Partners bankının təklifinə üstünlük verir, çünki bu təklif nağdsız hesablaşma mexanizmini nəzərdə tutur. Bu barədə danışıqlarla tanış iki mənbə Reuters-ə bildirib.

Mənbələrin sözlərinə görə, Xtellus ABŞ investorlarının sahib olduğu “Lukoil” səhm­lərinin nağdsız şəkildə dəyişdirilməsi və onların Rusiya neft şirkətinə qaytarılması müqabilində xarici aktivlərin verilməsi sxemini təklif edib. Məsələnin həssaslığı səbəbindən mənbələr adlarının açıqlanmasını istəməyiblər.

ABŞ Maliyyə Nazirliyi oktyabrda “Lukoil” və “Rosneft”ə qarşı bloklayıcı sanksiyalar tətbiq edildikdən sonra dəyəri təxminən 22 milyard dollar olan qlobal aktiv portfelinin satış müddətini 17 yanvara qədər uzadıb.

Xtellus şərh verməkdən imtina edib. “Lukoil” sorğuya cavab verməyib.

BlackRock, JPMorgan və Goldman Sachs kimi ABŞ fondları əvvəlcə rus şirkətlərinin qiymətli kağızlarını dondurmalı, daha sonra isə tamamilə silməli olduqlarından milyardlarla dollar itiriblər.

“Lukoil”in qlobal aktivləri – o cümlədən neft və qaz hasilatı layihələri, neftayırma müəssisələri və 2 000-dən çox yanacaqdoldurma məntəqəsi – Carlyle kimi ABŞ investisiya fondlarının və Chevron kimi neft şirkətlərinin marağına səbəb olub.

N.Təbrizli