ABİF 2025-ci ildə sahibkarlara 340 milyon manatdan çox güzəştli kredit verib

İqtisadiyyat Nazirliyinin tabeliyində fəaliyyət göstərən Azərbaycan Biznesinin İnkişafı Fondu (ABİF) 2025-ci ilin yanvar-noyabr aylarında sahibkarların 5 800-dən çox investisiya layihəsinə 340 milyon manatdan artıq güzəştli kredit ayırıb. Bunu iqtisadiyyat nazirinin müavini Elnur Əliyev deyib. 

 Əliyev bildirib ki, ABİF rəqabətqabiliyyətli və əlavə dəyər yaradan layihələrdə, xüsusilə ixrac və idxalın əvəzlənməsinə yönəlmiş təşəbbüslərdə iştirak edir. 2020–2025-ci illər üzrə bu qurum vasitəsilə həyata keçirilən layihələrin ümumi dəyəri təxminən 1,8 milyard manat təşkil edib.

2025-ci ilin 9 ayı da daxil olmaqla, sənaye zonalarında 171 sahibkarlıq subyekti rezident və qeyri-rezident statusu alıb, ümumi investisiya həcmi 8 milyard manatdan çox olub. Həmin dövrdə sənaye zonalarında ixrac 17% artıb və qeyri-neft-qaz ixracının təxminən 30%-ni təşkil edib.

Gülnar Nazimqızı