ABŞ onlarla ölkədən səfirlərini geri çağırır, siyahıda Ermənistan da var

ABŞ administrasiyası azı 29 ölkədən səfirləri geri çağırır. Bu barədə  Associated Press Dövlət Departamentinin iki əməkdaşına istinadən xəbər verir.

Məlumata görə, diplomatik missiya rəhbərlərinə ötən həftə bildirilib ki, onların səlahiyyət müddəti 2026-cı ilin yanvarında başa çatır. Agentlik qeyd edir ki, geri çağırılan səfirlərin hamısı keçmiş prezident Co Bayden dövründə təyin olunub.

ABŞ-ın yeni diplomatik strategiyası prezident Donald Trampın “Amerika əvvəlcə” (“America First”) siyasətini tam dəstəkləyən kadrların irəli çəkilməsini nəzərdə tutur. Dövlət Departamenti bildirib ki, səfir prezidentin şəxsi nümayəndəsidir və dövlət başçısı öz prioritetlərini irəli aparan şəxslərlə işləmək hüququna malikdir.

Səfirlərin diplomatik xidmətdən kənarlaşdırılmayacağı, istədikləri təqdirdə Vaşinqtona qayıdaraq digər tapşırıqlar üzərində çalışa biləcəkləri qeyd olunur.

Ən çox səfir Afrikadan geri çağırılıb — 13 ölkə. Avropada isə dəyişikliklər Ermənistan, Şimali Makedoniya, Monteneqro və Slovakiyanı əhatə edir.

N.Təbrizli