Əsədov: Azərbaycan–Türkiyə ticarət dövriyyəsi 2025-ci ilin 11 ayında 7.5% azalıb

Türkiyə Azərbaycanın əsas ticarət tərəfdaşlarından biri olaraq həm idxalda (3-cü yer), həm ixracda (2-ci yer), həm də ümumi ikitərəfli ticarət dövriyyəsində (2-ci yer) aparıcı mövqeyə malikdir. Bunu Azərbaycan-Türkiyə Birgə Hökumətlərarası Komissiyanın 12-ci iclasında çıxış edən Baş nazir Əli Əsədov deyib.

Əsədovun sözlərinə görə, son dövrdə obyektiv səbəblərdən Azərbaycan ilə Türkiyə arasında ticarət dövriyyəsində müəyyən azalma müşahidə olunub.

“2025-ci ilin 11 ayında ticarət dövriyyəsi 7.5% azalaraq 5.2 milyard dollar təşkil edib. Bu göstəricilər ölkələrimizin iqtisadi inkişaf templərinə uyğun deyil”, –  o qeyd edib.

Baş nazir vurğulayıb ki, mövcud iqtisadi potensial və coğrafi üstünlüklər ticarət dövriyyəsinin həcmini daha yüksək səviyyəyə qaldırmaq üçün real və hələ tam istifadə olunmamış imkanların mövcudluğunu göstərir.

Baş nazirin sözlərinə görə, qarşılıqlı ticarətin artırılmasına xidmət edən əsas amillərdən biri də kənd təsərrüfatı məhsullarının idxal və ixracının genişləndirilməsidir.

Gülnar