Tramp Luiziana qubernatorunu Qrenlandiya üzrə xüsusi elçi təyin edib

ABŞ Prezidenti Donald Tramp Luiziana ştatının qubernatoru Ceff Lendrini Qrenlandiya üzrə xüsusi elçi təyin edib. Lendri sosial mediada bu vəzifəni qəbul etməyə hazır olduğunu bildirərək Qrenlandiyanın ABŞ-a birləşdirilməsi istiqamətində işləmək niyyətini açıqlayıb.

Tramp təyinatı dekabrın 21-də elan edərək bildirib ki, Lendri Qrenlandiyanın ABŞ-ın milli təhlükəsizliyi üçün əhəmiyyətini anlayır.

Prezidentin sözlərinə görə, Vaşinqtonun marağı minerallardan deyil, milli təhlükəsizlikdən irəli gəlir. Tramp daha əvvəl də Arktika adasının ABŞ üçün strateji əhəmiyyət daşıdığını bəyan edib.

Bu qərar Danimarkada kəskin reaksiya doğurub. Kopenhagen ABŞ səfirini izahat üçün çağıracağını açıqlayıb. Danimarkanın xarici işlər naziri Lars Lökke Rasmussen Vaşinqtonun addımından dərin narahatlıq ifadə edərək, ölkəsinin suverenliyinə hörmətsizlik kimi qiymətləndirilə biləcək hərəkətlərə qarşı xəbərdarlıq edib.

Danimarkanın baş naziri Mette Frederiksen və Qrenlandiyanın baş naziri Yens-Fredrik Nilsen birgə bəyanatda milli sərhədlər və dövlətlərin suverenliyinin beynəlxalq hüquqa əsaslandığını vurğulayaraq, Qrenlandiyanın qrenlandiyalılara məxsus olduğunu və ABŞ-ın adanı işğal etməməli olduğunu bildiriblər.

Gülnar