Prezident Qarabağ Universitetinin yeni fakültələri üzrə işlərdə iştirak edib

Azərbaycan Prezidenti İlham Əliyev dekabrın 23-də Xankəndidə Qarabağ Universitetinin Mühəndislik fakültəsinin binasının təməlini qoyub, həmçinin Biznes və iqtisadiyyat fakültəsinin yeni inşa olunmuş binasının açılışında iştirak edib.

Dövlət başçısına məlumat verilib ki, Mühəndislik fakültəsində hazırda 314 tələbə və 19 nəfərlik professor-müəllim və texniki heyət fəaliyyət göstərir. Fakültədə bakalavriat səviyyəsində 7 ixtisas üzrə – elektrik və elektronika, inşaat, mexatronika və robototexnika, logistika və nəqliyyat texnologiyaları, kompüter mühəndisliyi, data analitika və riyaziyyat üzrə kadr hazırlığı aparılır. Yeni binanın qısa müddətdə istifadəyə verilməsi planlaşdırılır.

Biznes və iqtisadiyyat fakültəsində isə 505 tələbə və 20 nəfərlik heyət fəaliyyət göstərir. Burada iqtisadiyyat, maliyyə, mühasibat uçotu, menecment, dövlət və bələdiyyə idarəetməsi, beynəlxalq ticarət və logistika, turizm üzrə təhsil verilir. Yeni tədris binasında 40 auditoriya, laboratoriyalar, kitabxana və inzibati otaqlar yaradılıb.

Hazırda Qarabağ Universitetində 6 fakültə üzrə 27 ixtisasda 2 154 tələbə təhsil alır. Universitetdə son illər kampus, yataqxana, klinika və digər fakültə binalarının açılışı həyata keçirilib.