Putin İlham Əliyevi təbrik edib - Yenilənib

Azərbaycan Prezidentinin Mətbuat Xidmətinin məlumatına görə, Rusiya Prezidenti Vladimir Putin bu gün dövlət başçısına zəng edib.

Rusiya Prezidenti dövlət başçısını ad günü münasibətilə təbrik edib, ona prezidentlik fəaliyyətində uğurlar və möhkəm cansağlığı arzulayıb.

Prezident İlham Əliyev göstərilən diqqətə və təbrikə görə minnətdarlığını bildirib.

Telefon söhbəti zamanı Azərbaycan və Rusiya prezidentlərinin keçirdikləri son görüşdə müzakirə olunmuş məsələlərə toxunulub, ikitərəfli əməkdaşlığın perspektivləri, həmçinin regional məsələlər ətrafında fikir mübadiləsi aparılıb.

10:38

Rusiya Prezidenti Vladimir Putin Azərbaycan Prezidenti İlham Əliyevə ad günü münasibətilə təbrik teleqramı göndərib. Bu barədə Kremlin mətbuat xidməti məlumat yayıb. 

Putin təbrikində bildirib ki, İlham Əliyevin rəhbərliyi altında Azərbaycan sosial-iqtisadi sahələrdə tanınmış uğurlar əldə edib və beynəlxalq arenada mövqelərini möhkəmləndirir.

Rusiya prezidenti İlham Əliyevə cansağlığı, firavanlıq və uğurlar arzulayıb, ailəsinə salamlarını çatdırmağı xahiş edib.

Teleqramda qeyd olunub ki, Rusiya–Azərbaycan münasibətləri dostluq, mehriban qonşuluq və qarşılıqlı hörmət prinsiplərinə əsaslanır və strateji tərəfdaşlıq, müttəfiqlik ruhunda inkişaf etməyə davam edəcək.

Putin vurğulayıb ki, bu yanaşma hər iki ölkə xalqlarının maraqlarına cavab verir.