AMB 2026-cı il üçün pul siyasətinin hədəfini açıqlayıb

Azərbaycan Mərkəzi Bankı (AMB) 2026-cı ildə pul siyasətinin əsas məqsədinin illik inflyasiyanı 4±2% diapazonunda saxlamaq olduğunu bildirib.

AMB-nin məlumatına görə, inflyasiya hədəfi Dövlət Statistika Komitəsinin hesabladığı istehlak qiymətləri indeksinin son 12 ay üzrə dəyişimi əsasında ölçüləcək. Bank 2026-cı ildə orta illik inflyasiyanın 5,7% olacağını proqnozlaşdırır ki, bu da hədəf intervalına uyğundur.

Bəyanatda qeyd olunub ki, məzənnə sabitliyi qiymət sabitliyinin əsas lövbəri olaraq qalacaq, cari əməliyyatlar hesabının profisitli olması isə valyuta bazarında tarazlığı dəstəkləyəcək.

Baza ssenariyə görə, 2026-cı ildə cari əməliyyatlar hesabının profisiti 3 mlrd ABŞ dolları (ÜDM-in 3,7%-i) səviyyəsində gözlənilir.

AMB bildirib ki, pul siyasəti qərarları daxili və xarici risklərin hərtərəfli qiymətləndirilməsi əsasında qəbul ediləcək və inflyasiya proqnozları rüblük əsasda yenilənəcək.

N.Təbrizli