Deputat: Özəl sektorda gəlir vergisi güzəştləri yenilənir

Gələn aydan etibarən qeyri-neft və qeyri-dövlət sektorunda çalışan vətəndaşlar üçün fiziki şəxslərin gəlir vergisi üzrə mövcud güzəştlərin müddəti başa çatır. Deputat Vüqar Bayramov bildirib ki, “Vergi Məcəlləsi”nə əsasən, növbəti ildən aylıq əməkhaqqısı 2 500 manatadək olan şəxslərdən 3% gəlir vergisi tutulacaq.

Bayramovun sözlərinə görə, özəl sektorda çalışan bütün muzdlu işçilərə 200 manat məbləğində vergi güzəşti tətbiq olunur. Bu halda, aylıq maaşı 1 000 manat olan işçinin gəlir vergisi 24 manat təşkil edəcək. Daha geniş güzəştlər isə sosial həssas qruplara şamil edilir. Şəhidlərin valideynləri, dul həyat yoldaşları və övladlarının vergiyə cəlb olunan aylıq gəliri 800 manat azaldılır. Bu kateqoriyaya aid şəxslər 800 manatadək maaş aldıqları halda gəlir vergisi ödəməyəcək, 1 000 manat əməkhaqqında isə 6 manat vergi tutulacaq. Eyni güzəştlər Vətən müharibəsi qəhrəmanları və Milli Qəhrəmanlara da tətbiq edilir.

Qazilər və müharibə veteranları üçün gəlirdən 400 manat çıxılır. Bu halda minimum əməkhaqqı alanlar vergidən azad olunur, 1 000 manat maaş alanlar isə 18 manat gəlir vergisi ödəyəcəklər. Deputat əlavə edib ki, birinci qrup əlillər, məcburi köçkünlər və digər kateqoriyalar üçün də vergi güzəştləri mövcuddur və orta aylıq əməkhaqqının artımını nəzərə alaraq güzəşt məbləğlərinin artırılması məqsədəuyğun ola bilər.

Gülnar