Azərbaycanda KOB-lara 8 ildə 2,2 mln manat qrant ayrılıb

Son 8 ildə Azərbaycanda kiçik və orta biznes subyektlərinin (KOB) təhsil, elm və tədqiqat layihələrinə 129 layihə üzrə 2,2 milyon manat qrant ayrılıb.

Kiçik və Orta Biznesin İnkişafı Agentliyinin (KOBİA) açıqlamasına görə, bu müddət ərzində sahibkarlara 10 000-ə yaxın ödənişsiz məsləhət xidməti göstərilib, 64 800 sahibkara 5 200 təlim keçirilib. 2 200-dən artıq sahibkar isə video təlim platformasından istifadə edib.

Ölkənin 47 şəhər və rayonunda, o cümlədən işğaldan azad edilmiş Laçın, Zəngilan, Kəlbəcər və Füzulidə 48 KOB dostu fəaliyyət göstərir. 700-ə yaxın sahəvi görüş və 50 ictimai müzakirədə 22 500-dən çox sahibkar iştirak edib.

KOBİA-nın sosial layihələri çərçivəsində 220 qazi və şəhid ailəsi üzvü, 65 gənc və 70 qadın sahibkara biznesə başlamasında dəstək verilib. 850 gənc "KOB könüllüləri" proqramına qoşulub.

KOB sektorunun rəqəmsallaşması üçün e-KOB evi portalı beta versiyada istifadəyə verilib və yeni ildən tam fəaliyyət göstərəcək.

2018-2024-cü illərdə KOB-ların sayı 74% artaraq 424 000-i keçib. KOB-ların yaratdığı əlavə dəyər 2 dəfədən çox artaraq 21,1 milyard manata çatıb, əlavə dəyərdə payları 13,4%-dən 18,5%-ə yüksəlib. İşçi sayı 47,6% artaraq 417 800 nəfərə çatıb, dövriyyəsi isə 48 milyard manatla ölkə üzrə qeyri-neft dövriyyəsinin 37,4%-ni təşkil edib.

KOBİA 28 dekabr 2017-ci il tarixli Prezident fərmanı ilə yaradılıb və 8 ildə KOB sektorunun inkişafında institusional dayağa çevrilib.

Gülnar