On bir ayda ən çox xurma ixrac olunub - Rəsmi

Azərbaycanın aqrar məhsullar üzrə ixracı 2025-ci ilin yanvar–noyabr aylarında ötən ilin eyni dövrü ilə müqayisədə 27,1% artaraq 892,1 milyon ABŞ dollarına çatıb. İqtisadi İslahatların Təhlili və Kommunikasiya Mərkəzinin (İİTKM) məlumatına görə, aqrar-sənaye məhsulları üzrə ixrac isə 0,3% artaraq 288,2 milyon ABŞ dolları təşkil edib.

Hesabat dövründə aqrar və aqrar-sənaye məhsullarının birgə ixracı 19,4% artaraq 1,2 milyard ABŞ dollarına bərabər olub.

İİTKM-nin icmalına görə, yanvar–noyabr aylarında qeyri-neft sektoruna aid ixrac malları arasında qızıl 297,4 milyon ABŞ dolları ilə ilk sırada yer alıb. Pomidor (tomat) ixracı 175,4 milyon ABŞ dolları ilə ikinci, karbamid ixracı isə 163,4 milyon ABŞ dolları ilə üçüncü olub.

Eyni zamanda, 2025-ci ilin noyabr ayında qeyri-neft sektoru üzrə ixracda xurma 40,9 milyon ABŞ dolları ilə birinci yerə yüksəlib. Həmin ay meşə fındığı ixracı 26,2 milyon ABŞ dolları ilə ikinci, emal olunmamış, aşqarlanmamış alüminium isə 23 milyon ABŞ dolları ilə üçüncü pillədə qərarlaşıb.

Gülnar Nazimqızı