İranda etiraz aksiyaları dayanıb - Reuters

İranda son həftələrdə davam edən etiraz aksiyaları hakimiyyət qüvvələrinin ölümcül müdaxiləsindən sonra dayanıb. Bu barədə Reuters ölkədəki insan haqları təşkilatları və yerli sakinlərə istinadən xəbər verir.

Məlumata görə, təhlükəsizlik qüvvələrinin güc tətbiqi və kütləvi həbslər etirazların səngiməsi ilə nəticələnib. Mənbələr daha çox insanın saxlanıldığını bildirir.

Reuters yazır ki, ABŞ Prezidenti Donald Trampın etirazçılara qarşı qətllər davam edərsə, İrana müdaxilə edilə biləcəyi ilə bağlı açıqlamaları beynəlxalq gərginliyi artırıb. Tramp etirazçıları dəstəkləmək məqsədilə Tehrana qarşı bir neçə dəfə hərbi əməliyyatla hədələyib. Lakin çərşənbə günü Vaşinqtonun İrana təzyiqləri azaltmaq niyyətində olduğuna dair məlumatların yayılmasından sonra bu təhdidlərin də səngidiyi qeyd olunur.

Qeyd edilir ki, etirazlar dekabrın 28-də, sanksiyalar səbəbindən İran iqtisadiyyatının ciddi zərbə alması, inflyasiyanın sürətlə artması fonunda başlayıb. Aksiyalar qısa müddətdə genişlənərək 1979-cu il İslam İnqilabından bəri ölkəni idarə edən ruhani hakimiyyət üçün ən ciddi daxili sınaqlardan birinə çevrilib.