Baş nazir: Azərbaycan-Türk Dövlətləri Təşkilatı ticarət və sərmayəyə hazırdır

2025-ci il Azərbaycanın Türk Dövlətləri Təşkilatına üzv ölkələrlə ümumi ticarət dövriyyəsi 5 faizdən çox artaraq 7,3 milyard ABŞ dolları təşkil edib. Bunu Baş nazir Əli Əsədov bildirib. 

Onun sözlərinə görə, Azərbaycanın üzv dövlətlərə yatırdığı sərmayələrin ümumi həcmi 21 milyard ABŞ dollarıdır. Eyni zamanda, bir sıra tərəfdaş ölkələrlə yaradılmış birgə investisiya fondları prioritet sahələrdə qarşılıqlı sərmayə qoyuluşunun genişlənməsinə və iqtisadi əməkdaşlığın möhkəmlənməsinə xidmət edir.

Baş nazir əlavə edib ki, mövcud potensial bu göstəricilərdən qat-qat böyükdür. Qarşılıqlı ticarət dövriyyəsinin artırılması, investisiya layihələrinin təşviqi, sənaye kooperasiyasının dərinləşdirilməsi, kənd təsərrüfatı, rəqəmsal iqtisadiyyat, kiçik və orta sahibkarlıq, innovasiya və yüksək texnologiyalar sahələrində əməkdaşlığın genişləndirilməsi iqtisadi potensialın tam realizasiyasına imkan yaradacaq.

Gülnar Nazimqızı