Azərbaycan banklarının kredit portfeli 10 ayda 14% artıb

Azərbaycan banklarının kredit portfeli 2026-cı ilin ilk 10 ayında 14% artaraq 34,3 milyard manata çatıb. Bunu Azərbaycan Mərkəzi Bankının sədri Taleh Kazımov bildirib.

Eyni dövrdə bank sektorunun aktivləri 15,1% artaraq 65,7 milyard manat təşkil edib. Qeyri-işlək kreditlərin ümumi kredit portfelində payı 2,7% olub.

Əhalinin əmanətləri 12,9%, o cümlədən müddətli əmanətləri 13,7% artıb.

Kazımovun sözlərinə görə, məcburi ehtiyatlar çıxılmaqla bank sektorunun struktur likvidlik profisiti oktyabrda 6,4 milyard manata çatıb. Bu, ötən ilin sonu ilə müqayisədə 2,2 dəfə çoxdur. Banklar normativləri pozmadan əlavə 4,6 milyard manat kredit verə bilər.

Sektorun məcmu kapital adekvatlığı 16,7%, likvidliyin örtülmə əmsalı isə 156% təşkil edib. AMB sədrinin sözlərinə görə, hər iki göstərici normativ tələbləri əhəmiyyətli dərəcədə üstələyir.