2027-ci ildə hərbçilərin mənzil təminatına ayrılan vəsait 41,2% azaldılır

2027-ci ilin dövlət büdcəsində hərbi qulluqçuların mənzillə təmin olunması və kirayə kompensasiyalarına ümumilikdə 29,7 milyon manat ayrılması nəzərdə tutulub. Bu, 2026-cı ilin büdcəsində həmin məqsədlər üçün nəzərdə tutulan 50,5 milyon manatla müqayisədə 20,8 milyon manat və ya 41,2% azdır. Bu, 2027-ci ilin dövlət büdcəsi layihəsində əksini tapıb.

Layihəyə əsasən, 20 il və daha çox xidmət etmiş işləyən və ehtiyatda olan hərbi qulluqçuların mənzillə təmin olunması və digər zəruri xərclərin maliyyələşdirilməsi üçün 15 milyon manat ayrılacaq. Bu istiqamətdə 2026-cı ildə 35 milyon manat nəzərdə tutulmuşdu. Beləliklə, vəsait 20 milyon manat və ya 57,1% azalacaq.

Kirayəyə götürülmüş yaşayış sahəsinə görə yaşayış yeri olmayan hərbi qulluqçulara, o cümlədən ehtiyatda və istefada olan hərbçilərə pul kompensasiyasının ödənilməsi üçün 2027-ci ildə 14,7 milyon manat ayrılması planlaşdırılır. 2026-cı ildə bu məqsədlə 15,5 milyon manat nəzərdə tutulmuşdu. Azalma 800 min manat və ya 5,2% təşkil edir.

Beləliklə, 2027-ci ildə hərbi qulluqçuların mənzil təminatı və kirayə kompensasiyası üzrə hər iki istiqamətdə büdcə vəsaitinin azaldılması planlaşdırılır.