Parlamentdə "Təmiz Enerji Günü" olacaq

Milli Məclisdə Beynəlxalq Təmiz Enerji Günü münasibətilə tədbir keçiriləcək. Bu barədə Təbii ehtiyatlar,energetika və ekologiya komitəsinin 2026-ci il yaz sessiyası üçün işlər planında qeyd olunub. 

Tədbir İqtisadi Əməkdaşlıq Təşkilatı və BMT-nin Sənaye İnkişaf Təşkilatının təsis etdiyi Təmiz Enerji Mərkəzi (IƏT TEM) ilə birgə təşkil olunacaq və mart ayında baş tutacaq.

Mart–aprel aylarında yaşıl iqtisadiyyata keçiddə bərpa olunan enerjinin rolu mövzusunda müzakirələr aparılacaq, o cümlədən Qaradağ Günəş Elektrik Stansiyası ilə tanışlıq nəzərdə tutulur.

Tədbirlər Energetika Nazirliyi və MASDAR şirkətinin iştirakı ilə keçiriləcək.

Apreldə ekoloji tarazlığın qorunmasında təhsilin rolu mövzusunda tədbir planlaşdırılır.

Müzakirələrdə Elm və Təhsil Nazirliyi və ADA Universiteti iştirak edəcək.

Həmin dövrdə həmçinin fövqəladə halların ekosistemə mümkün təsiri ilə bağlı dəyirmi masa təşkil olunacaq; tədbirə Fövqəladə Hallar Nazirliyi və Ekologiya və Təbii Sərvətlər Nazirliyi cəlb ediləcək.

İyunda ekoloji tarazlığın qorunmasında ekoloji mədəniyyətin rolu mövzusunda müzakirələr, eləcə də tullantıların təhlükəsiz idarə olunmasına dair dinləmə keçiriləcək. Dinləmələrdə Hesablama Palatası, Ekologiya və Təbii Sərvətlər Nazirliyi və “Təmiz Şəhər” ASC-nin iştirakı nəzərdə tutulur.

Gülnar Nazimqızı