Zelenski: ABŞ-ın Ukraynaya təhlükəsizlik zəmanətləri ilə bağlı sənəd tam hazırdı

Ukrayna Prezidenti Vladimir Zelenski ABŞ tərəfindən Ukraynaya təhlükəsizlik zəmanətlərinin verilməsi ilə bağlı sənədin tam hazır olduğunu açıqlayıb.

Zelenski Vilnüsə səfəri zamanı jurnalistlərə verdiyi açıqlamada bildirib ki, sənəd tam şəkildə razılaşdırılıb və hazırda tərəfdaşlardan imzalanma tarixi və yerinin təsdiqlənməsi gözlənilir.

“Bizim üçün təhlükəsizlik zəmanətləri, ilk növbədə, ABŞ-dan gələn təhlükəsizlik zəmanətləridir. Sənəd 100 faiz hazırdır. İmzalandıqdan sonra o, təsdiq üçün ABŞ Konqresinə və Ukrayna Parlamentinə göndəriləcək”, –  Zelenski vurğulayıb.

Prezident, həmçinin 24–25 yanvar tarixlərində Əbu-Dabidə Ukrayna və Rusiya nümayəndələri, eləcə də ABŞ vasitəçilərinin iştirakı ilə keçirilən üçtərəfli görüşə də toxunub. Onun sözlərinə görə, Vaşinqtonun müharibəyə son qoymaq məqsədilə təklif etdiyi çərçivə müzakirə edilsə də, hələlik hər hansı razılıq əldə olunmayıb.

Zelenski qeyd edib ki, Əbu-Dabidə 20 maddəlik Amerika planı və problemli məsələlər ətrafında müzakirələr aparılıb.

 “Əvvəllər daha çox problemli məsələ var idi, indi onların sayı azalıb”, - o bildirib. 

O bildirib ki, Moskva Ukraynanın Rusiyanın nəzarətinə keçməyən şərq əraziləri ilə bağlı mövqeyini dəyişməyə çalışsa da, Kiyev ərazi bütövlüyü prinsipindən geri çəkilmir.

“Bunlar iki prinsipial fərqli mövqedir – Ukrayna və Rusiya mövqeləri. Amerikalılar kompromis tapmağa çalışırlar. Bunun üçün bütün tərəflər, o cümlədən ABŞ kompromislərə hazır olmalıdır”, –  Zelenski əlavə edib.

Gülnar