Bayramov və Əraqçi arasında telefon danışığı olub

Azərbaycanın xarici işlər naziri Ceyhun Bayramov ilə İranın xarici işlər naziri Seyid Abbas Əraqçi arasında telefon danışığı baş tutub.Bu barədə Azərbaycan Xarici İşlər Nazirliyi məlumat yayıb.

Danışıq zamanı İran ətrafında yaranmış vəziyyət müzakirə olunub.

Bayramov bölgədə artan gərginliklə bağlı narahatlığını ifadə edib və beynəlxalq hüquq normalarına uyğun olaraq dialoq və diplomatik vasitələrlə problemlərin həllinin vacibliyini vurğulayıb.

O, həmçinin Azərbaycanın hava məkanının və ərazisinin heç bir xarici dövlət tərəfindən qonşu İran və ya digər ölkələrə qarşı hərbi əməliyyatlar üçün istifadə olunmasına icazə verilməyəcəyini bildirib.

Nazirlər həmçinin digər ikitərəfli və regional məsələlərə dair fikir mübadiləsi aparıblar.