Minlərlə insanın sürücülük vəsiqəsi əlindən alınıb - Deputat

Son dövrlər yol hərəkəti qaydalarının pozulmasına görə cərimələrin sərtləşdirilməsi və bal sisteminin tətbiqi cəmiyyətdə narazılıq doğurub. Bunu deputat Razi Nurullayev fevralın 20-də Milli Məclisdə keçirilən iclasda çıxışı zamanı deyib. 

O qeyd edib ki, qayda və intizam vacibdir, lakin bu yanaşma problemi həll etməkdən çox vətəndaşları sıxışdırır.

Alternativ nəqliyyat imkanları yoxdur: Regionlarda sürücülük bəzən ailənin dolanışığı deməkdir, ictimai nəqliyyat hər yerdə əlçatan deyil.

"Cərimə sistemi təkbaşına ədalətli deyil: Minlərlə sürücü 20 bal toplayaraq vəsiqəsindən məhrum edilib, lakin onlara seçim və alternativ təqdim olunmayıb. Cərimə siyasəti real infrastruktur islahatları ilə paralel aparılsın. Yol nişanları və xətləri təkmilləşdirilsin.  İşıqlı piyada keçidləri və ağıllı nəzarət sistemləri quraşdırılsın", - deputat bildirib. 

Deputat vurğulayıb ki, yalnız bu yolla yol təhlükəsizliyi artırıla bilər, əks halda cərimələr cəmiyyətdə narazılığı dərinləşdirəcək.

Gülnar Nazimqızı