İlham Əliyev: Silahlı Qüvvələr bir nömrəli səfərbərlik vəziyyətinə gətirilib

 İranın Naxçıvana pilotsuz uçuş aparatları ilə hücumu fonunda ölkənin təhlükəsizlik qurumları yüksək hazırlıq vəziyyətinə gətirilib. Bu barədə Azərbaycan Prezidenti İlham Əliyev bildirib. 

Prezident qeyd edib ki, baş verən hadisə ilə bağlı ilk növbədə diplomatik kanallar vasitəsilə zəruri addımlar atılacaq.

“Diplomatik yollarla bütün lazımi tədbirlər görüləcək. Bizim Silahlı Qüvvələrimiz – Müdafiə Nazirliyi, Dövlət Sərhəd Xidməti və digər bütün Xüsusi Təyinatlı Qüvvələr bir nömrəli səfərbərlik vəziyyətinə gətirilib və istənilən əməliyyatı keçirməyə hazır olmalıdırlar”, – dövlət başçısı bildirib.

İlham Əliyev əlavə edib ki, proseslərin gedişi ilə bağlı Azərbaycan ictimaiyyəti mütəmadi şəkildə məlumatlandırılacaq.

Prezident vurğulayıb ki, ölkənin təhlükəsizliyinə yönələn hər hansı təhdidə qarşı qətiyyətli cavab veriləcək.

“Azərbaycan xalqı əmin olmalıdır ki, istənilən bəd qüvvə onlara qarşı bizim ‘Dəmir yumruğ’umuzu görəcək”, – o qeyd edib.

Gülnar Nazimqızı