Xameneinin oğlu Ali Lider seçildi - Yenilənib

İranın Ekspertlər Şurası ayətullah Əli Xameneinin oğlu Müctəba Xameneini ölkənin yeni Ali Lideri seçib. Bu barədə İranın Fars xəbər agentliyi məlumat yayıb.

Məlumata görə, 56 yaşlı Müctəba Xamenei Ekspertlər Şurasının qərarı ilə İranın üçüncü Ali Lideri olub və səsvermədə yekdilliklə seçilib.

Ali Lider postu uğrunda digər mümkün namizədlər arasında Ekspertlər Məclisinin sədr müavini vəzifəsini icra edən Əlirez Ərafi, ruhani Məhəmməd Mehdi Mirbağeri və İran İslam Respublikasının qurucusu Ruhullah Xomeyninin nəvəsi Həsən Xomeyni də göstərilirdi.

Müctəba Xameneinin namizədliyi bəzi ruhanilər tərəfindən mübahisəli hesab edilsə də, Ekspertlər Şurasının qərarı ilə o, vəzifəyə seçilib. Bildirilir ki, o, atasından fərqli olaraq müctəhid statusuna və ayətullah tituluna malik deyil, bu isə İran konstitusiyası baxımından namizədliyini mübahisəli edən amillərdən biridir.

İran İslam İnqilabı Keşikçiləri Korpusu artıq yeni Ali Liderə sədaqət andı içib. İranın xarici işlər naziri Abbas Əraqçi də Müctəba Xameneini təbrik edərək diplomatik korpus adından ona dəstək ifadə edib.

ABŞ prezidenti Donald Tramp əvvəllər Müctəba Xameneinin namizədliyini qəbuledilməz adlandırsa da, onun seçilməsindən sonra məsələ ilə bağlı şərh verməkdən imtina edib və “Görəcəyik nə olacaq” deməklə kifayətlənib.

ABŞ senatoru Lindsi Qraham isə yeni liderin Vaşinqton üçün qəbuledilməz olduğunu bildirərək onun “atası ilə eyni aqibəti yaşaya biləcəyini” deyib.

X. Əliyeva