İşğaldan azad olunmuş ərazilərdə buraxılış imtahanı: 105 şagird iştirak edib

Martın 15-də Dövlət İmtahan Mərkəzi (DİM) işğaldan azad olunmuş Xankəndi, Şuşa, Xocalı, Laçın, Kəlbəcər və Ağdam rayon və şəhərlərində tam (11 illik) orta təhsil səviyyəsi üzrə buraxılış imtahanı keçirib. İmtahanlarda ümumilikdə 105 şagirdin iştirakı nəzərdə tutulub.

DİM-in Bərdə regional bölməsinin məlumatına görə, imtahanlar 6 məktəb binasında – Xankəndi şəhəri 4 nömrəli, Xocalı şəhəri 1 nömrəli, Şuşa şəhəri 1 nömrəli, Laçın şəhəri 2 nömrəli, Kəlbəcər şəhəri 1 nömrəli və Ağdam rayonunun Kəngərli kənd tam orta məktəbində təşkil olunub.

İmtahan prosesinə 6 bina nümayəndəsi, 6 imtahan rəhbəri və 8 zal nəzarətçisi cəlb edilib. İmtahan bütün binalarda eyni vaxtda başlayıb və 3 saat davam edib.

Məlumata görə, imtahanlar təlimata uyğun şəkildə keçirilib və şagirdlərin biliklərini nümayiş etdirmələri üçün zəruri şərait yaradılıb.

Qeyd edək ki, Kəlbəcər şəhəri 1 nömrəli və Ağdam rayonunun Kəngərli kənd tam orta məktəblərində buraxılış imtahanları bu il ilk dəfə təşkil olunub.