Türkiyədə şagird hücumu əvvəlcədən planlaşdırıb

Türkiyənin Kahramanmaraş şəhərində məktəbdə silahlı hücum törədən 14 yaşlı şagirdin kompüterində yaxın gələcək üçün planlaşdırılan yeni hücuma dair sənəd aşkarlanıb. Bu barədə Türkiyə Prokurorluğu ilkin məlumat yayıb. 

Prokurorluğun məlumatına görə, 8-ci sinif şagirdi İsa Aras Mersinli oxuduğu məktəbdə polis əməkdaşı olan atasına məxsus silahdan istifadə edərək hücum həyata keçirib və nəticədə 9 nəfəri öldürüb. Hücum edən şəxs də hadisə zamanı ölüb.

Araşdırma zamanı onun kompüterində 11 aprel 2026-cı il tarixli sənəd tapılıb. Sənəddə yaxın zamanda böyük bir cinayət törədəcəyi qeyd olunub.

İstintaq çərçivəsində şagirdin atası Uğur Mersinli saxlanılıb və məhkəmə qərarı ilə həbs edilib. Anası Peyman Pınar Mersinli ilə bağlı araşdırmalar davam edir. Türkiyə Təhlükəsizlik Baş İdarəsi hadisənin terrorla əlaqəsinin olmadığını, hücumun fərdi xarakter daşıdığını açıqlayıb.

Hadisə zamanı riyaziyyat müəllimi Ayla Kara və bir neçə şagird həlak olub. Məlumata görə, müəllim hücum zamanı şagirdlərini qorumağa çalışarkən güllələrin hədəfinə çevrilib.

Faktla bağlı istintaq davam edir.

Aytac Zeynalova