Deputat: qanun müzakirəyə çıxmamış mətbuatda təhrif olunmuş xəbərlər yayılır

Gömrük sistemində aparılan islahatlar şəffaflığın artırılmasına xidmət edir. Bunu 
deputat Azər Əmiraslanov “Gömrük Məcəlləsində dəyişiklik edilməsi haqqında” qanun layihəsi ilə bağlı çıxışında bildirib.

Onun sözlərinə görə, Dövlət Gömrük Komitəsində həyata keçirilən tədbirlər, xüsusilə rəqəmsallaşma istiqamətində atılan addımlar təqdirəlayiqdir və bu sahədə keyfiyyət dəyişiklikləri yaradır.

Deputat vurğulayıb ki, Azərbaycan tranzit potensialının gücləndirilməsi istiqamətində ciddi hədəflər müəyyən edib və təqdim olunan qanun layihəsi də bu məqsədlərə uyğun olaraq hazırlanıb.

Əmiraslanov qeyd edib ki, bəzi media orqanlarında qanun layihəsi ilə bağlı təhrif olunmuş məlumatlar yayılıb.

“Bu qanun hələ geniş müzakirədən keçməyib və ilk dəfə parlamentdə müzakirə olunacaq. Ümid edirəm ki, müzakirələrdən sonra sənədin mahiyyəti hər kəs üçün daha aydın olacaq”, - deputat deyib. 

Gülnar Nazimqızı