ABŞ-ın Aİ ilə ticarət kəsiri martda kəskin artıb

ABŞ-ın Avropa İttifaqı ilə mal ticarətində kəsiri 2026-cı ilin martında kəskin artaraq təxminən 9 milyard dollara çatıb.
ABŞ Siyahıyaalma Bürosunun mövsümi düzəliş edilməmiş məlumatlarına görə, martda Aİ-dən ABŞ-a mal idxalı 48,8 milyard dollar, ABŞ-ın Aİ-yə ixracı isə 39,8 milyard dollar təşkil edib. Nəticədə ticarət kəsiri fevraldakı 1,7 milyard dollardan martda təxminən 9 milyard dollara yüksəlib.

ABŞ Ticarət Nazirliyinin mövsümi düzəliş edilmiş məlumatlarında isə Aİ ilə ticarət kəsirinin martda 4,1 milyard dollar artaraq 9,2 milyard dollara çatdığı bildirilir. Bu hesablamaya görə, ABŞ-ın Aİ-yə ixracı 37,2 milyard dollar, Aİ-dən idxalı isə 46,4 milyard dollar olub.

Ümumilikdə ABŞ-ın xarici ticarət kəsiri martda 4,4% artaraq 60,3 milyard dollara yüksəlib. Reuters-in məlumatına görə, idxalın artımı ixracın artımını üstələyib.

Bu göstəricilər Vaşinqtonla Brüssel arasında tariflərlə bağlı gərginliyin davam etdiyi dövrə təsadüf edir. ABŞ Prezidenti Donald Tramp daha əvvəl Avropa avtomobillərinə və yük maşınlarına idxal rüsumlarının artırıla biləcəyini bildirib.

Gülnar Nazimqızı