Azərbaycan 2 QVt bərpa olunan enerji gücünün inteqrasiyası üçün enerji şəbəkəsini hazırlayıb

Azərbaycan 2027-ci ilin sonunadək 2 QVt bərpa olunan enerji gücünün enerji sisteminə inteqrasiyası üçün əsas hazırlıq işlərini tamamlayıb. Bunu Energetika Nazirliyi yanında Bərpa Olunan Enerji Mənbələri Dövlət Agentliyinin direktoru Cavid Abdullayev bildirib.

Onun sözlərinə görə, birinci mərhələ üzrə enerji şəbəkəsinin təhlili ABŞ-ın Tetra Tech və Türkiyənin EFRA şirkətləri tərəfindən aparılıb. Araşdırma enerji sisteminin yeni gücləri qəbul etməsi üçün hansı modernizasiya işlərinin görülməli olduğunu müəyyən edib.

“Demək olar ki, bütün bu işlər çox uğurla həyata keçirilib”, – Abdullayev qeyd edib.

O bildirib ki, birinci mərhələ çərçivəsində nəzərdə tutulan BESS enerji saxlama sistemi artıq qurulub.

Hazırda 2027-ci ildən sonrakı dövr üzrə ikinci mərhələnin araşdırmaları aparılır. Abdullayevin sözlərinə görə, Çin institutu 2 QVt bərpa olunan enerjinin inteqrasiyasından sonra enerji şəbəkəsinin necə işləyəcəyini təhlil edir.

“Ümid edirik ki, yay aylarının sonuna qədər bu təhlil yekunlaşacaq”, – o deyib.

Abdullayev həmçinin bildirib ki, Azərbaycanda dənizdə külək enerjisi zonaları üzrə sənədlərin hazırlanması yekunlaşmaq üzrədir.

“Sectorlar hazırdır, bir-iki razılaşdırma qalıb. Bundan sonra sənədlər hökumətə təqdim olunacaq”, – o qeyd edib.

Onun sözlərinə görə, əvvəlcə Nazirlər Kabineti tərəfindən bərpa olunan enerji zonaları müəyyən edilməli, daha sonra layihələrin həyata keçirilməsi mexanizmi seçilməlidir.

Abdullayev əlavə edib ki, Azərbaycan yaşıl enerji dəhlizləri üzrə bir neçə istiqamətdə iş aparır. Bunlara Naxçıvan üzərindən, Gürcüstan və Türkiyə vasitəsilə marşrutlar, eləcə də Qara dənizin dibi ilə Avropaya çəkilməsi planlaşdırılan kabel layihəsi daxildir.

Aytac Zeynalova