ABB Körfəz investorlarından cəlb etdiyi maliyyənin həcmini 230 milyon dollara çatdırıb

ABB Körfəz ölkələrinin maliyyə bazarlarından cəlb etdiyi vəsaitin həcmini 230 milyon dollara çatdırıb.

Bunu ABB-nin İdarə Heyətinin sədri Abbas İbrahimov jurnalistlərə bildirib.

Onun sözlərinə görə, bank əvvəlcə 100 milyon dollarlıq maliyyə vəsaiti cəlb edib, lakin sonradan tərəfdaşlar ABB-yə daha böyük həcmdə vəsait ayırmağı təklif ediblər.

İbrahimov bildirib ki, buna səbəb bankın maliyyə göstəricilərinin yaxşılaşması, öhdəliklərini vaxtında yerinə yetirməsi və kredit reytinqlərinin yüksəlməsi olub.

“Reytinqlərimizin artması və müsbət kredit tarixçəmiz borclanma şərtlərinin yaxşılaşmasına səbəb oldu. Tərəfdaşlarımız bu dəfə daha böyük məbləğ təklif etdilər”, - o qeyd edib.

ABB rəhbərinin sözlərinə görə, vəsaitlər əsasən uzunmüddətli və sabit faizli maliyyələşmə şəklində cəlb olunub.

İbrahimov bildirib ki, cəlb edilən vəsait həm iri biznes layihələrinin, həm də kiçik və orta sahibkarlığın maliyyələşdirilməsinə yönəldiləcək.

Onun sözlərinə görə, ABB gələcəkdə beynəlxalq maliyyə bazarlarından 300-500 milyon dollar həcmində əlavə vəsait cəlb etmə imkanlarını da nəzərdən keçirir.

N.Tebrizli