Azərbaycanda iki ölkəyə yeni səfirlər təyin edilib

Azərbaycan Prezidenti İlham Əliyev bir sıra diplomatik təyinatlarla bağlı sərəncamlar imzalayıb.

Sərəncamlara əsasən, Zaur Rəşid oğlu Əhmədov Azərbaycanın İsveçdə, eyni zamanda Danimarka, Finlandiya və Norveçdə fövqəladə və səlahiyyətli səfiri vəzifəsindən geri çağırılıb. Əhmədov İsveçdə səfir vəzifəsinə 2021-ci ilin aprelində təyin edilmişdi.

Digər sərəncamla Elnur İxtiyar oğlu Sultanov Azərbaycanın İsveçdə fövqəladə və səlahiyyətli səfiri təyin edilib.

Sultanov 2021-ci ildən Azərbaycanın Latviyadakı fövqəladə və səlahiyyətli səfiri vəzifəsində çalışıb. O, bu vəzifədən də geri çağırılıb.

Prezidentin digər sərəncamına əsasən, Nərminə Elsevər qızı Mustafayeva Azərbaycanın Latviyadakı fövqəladə və səlahiyyətli səfiri təyin edilib.

Mustafayeva 2020-ci ildən Azərbaycanın Türkiyənin İstanbul şəhərində baş konsulu vəzifəsində çalışıb.