Azərbaycanda 7 ayda 1 851 nəfərin narkotik istifadəçisi olduğu müəyyən edilib

2026-cı ilin yanvar-iyulunda Azərbaycanda narkotik vasitələrdən istifadənin müəyyənləşdirilməsi məqsədilə 3 778 nəfər tibbi müayinədən keçirilib.

Dövlət Komissiyasının İşçi Qrupunun məlumatına görə, müayinələrin nəticəsində 1 851 nəfərin narkotik istifadəçisi olduğu müəyyən edilib.

Ümumilikdə isə Daxili İşlər Nazirliyi tərəfindən müxtəlif növ sərxoşluq hallarının müəyyənləşdirilməsi üçün 54 434 nəfər Respublika Narkoloji Mərkəzinə yönləndirilib.

Hazırda metadonla əvəzedici müalicə proqramı çərçivəsində üç məntəqədə 667 nəfər müalicə alır. Onlardan 258-i Respublika Narkoloji Mərkəzində, 288-i QİÇS-lə Mübarizə Mərkəzində, 121-i isə Sumqayıt Narkoloji Mərkəzində müalicə olunur.

Hesabat dövründə “802” qaynar xəttinə 548 müraciət daxil olub. Müraciətlərin 77-si narkotiklərin qanunsuz dövriyyəsi, 41-i narkotik asılılığından müalicə, 430-u isə digər məsələlərlə bağlı olub.

“802” qaynar xətti narkotik vasitələrin qanunsuz dövriyyəsi və narkomanlığın yayılmasının qarşısının alınması məqsədilə fəaliyyət göstərir. Daxil olan məlumatlar əsasında aidiyyəti qurumlara müraciətlər göndərilir, qanunsuz dövriyyə ilə bağlı məlumatlar araşdırılır və narkotik asılılığından əziyyət çəkən şəxslərin müalicəyə yönləndirilməsi təmin edilir.

Gülnar Nazimqızı