Könül Qasımova uşaqlara əzabvermə ittihamı ilə həbs olundu

“Sevgi evi” Qadın və Uşaq Sığınacağının sahibi Könül Qasımova barəsində 3 aylıq həbs qətimkan tədbiri seçilib. Bu barədə yerli mətbuat yazıb. 

Xətai Rayon Məhkəməsi ötən ay bununla bağlı qərar qəbul edib. Qasımovaya qarşı Cinayət Məcəlləsinin 133.2.1, 133.2.3, 133.2.4 və 133.2.6-cı maddələri ilə, yəni iki və daha çox şəxsə qarşı, qrup halında, köməksiz və yetkinlik yaşına çatmayan şəxslərə qarşı, habelə işgəncə verməklə əzab yetirmə ittihamları irəli sürülüb.

Könül Qasımova daha əvvəl də əzab vermə ittihamı ilə məhkəmə qarşısına çıxarılıb. 2023-cü ildə Sabunçu Rayon Məhkəməsinin hökmü ilə ona Cinayət Məcəlləsinin 133-cü maddəsi üzrə 2 il müddətinə azadlıqdan məhrumetmə cəzası təyin edilib.

Lakin himayəsində azyaşlı övladının olması nəzərə alınaraq, qanunvericiliyə uyğun şəkildə cəzanın icrası uşağın 14 yaşına çatmasına qədər təxirə salınıb.

Hazırkı iş üzrə irəli sürülən ittihamlar əvvəlki cinayət işi ilə müqayisədə daha ağır tərkibləri əhatə edir. İttihamlar üzrə təqsirləndirilən şəxsin günahı məhkəmənin qanuni qüvvəyə minmiş hökmü ilə təsdiqlənməyib.