Tankerlərin qiyməti 2008-ci ildən bəri rekord həddə çatıb — "Financial Times"

Fars körfəzindən xam neft daşımalarına artan tələbat və dəniz nəqliyyatına qarşı davam edən hücumlar fonunda neft tankerlərinin dəyəri kəskin artaraq 2008-ci ildən bəri ən yüksək həddə çatıb. Bu barədə "Financial Times" gəmi brokeri "Braemar"ın məlumatlarına istinadən xəbər verir.

Məlumata görə, ən iri sinif neft tankerlərinin (həm yeni, həm də istifadədə olmuş müasir gəmilərin) bazar dəyəri son rübdə 130 milyon dolları ötüb, supertankerlərin illik icarə haqqı isə tarixi pik həddə yüksəlib. Əsas tələbat Yaxın Şərq hasilatçılarının ixrac üzərində birbaşa nəzarəti qorumaq üçün şəxsi donanmalar qurmaq cəhdlərindən qaynaqlanır.

ABŞ və İran arasında Hörmüz boğazının açılması üzrə sülh danışıqlarının çıxılmaz vəziyyətə düşdüyü bir vaxtda, BƏƏ-nin "ADNOC" və Küveytin "KPC" şirkətləri neftin boğazdan kənarda gözləyən digər gəmilərə ötürülməsini nəzərdə tutan servis reysləri təşkil edib. "ADNOC" avqustda bu məqsədlə 1,3 milyard dollara 6 supertanker və 5 iritutumlu qazdaşıyan gəmi alıb. Analitik "Vortexa" şirkətinin məlumatına görə, boğazdan keçən bütün reyslərin yarıdan çoxunu cəmi 29 tanker həyata keçirir. "Clarksons" agentliyi isə bildirir ki, yüksək risk səbəbindən Hörmüz boğazından Çinə həyata keçirilən reyslərin gündəlik gəliri 550 min dolları keçib.

N.Təbrizli