Media və Yayım Şurası İran telekanalını Azərbaycanla bağlı dezinformasiyada ittiham edib

İranın “Səhər” (“Sahar Azəri”) telekanalı Türkiyənin Diyarbakır vilayətində keçirilən tədbirə aid görüntüləri Azərbaycanda hicablı şəxslərə dəstək məqsədilə təşkil olunmuş aksiya kimi təqdim edib. Bu barədə Media və Yayım Şurasının açıqlamasında bildirilib.

Şuranın məlumatına görə, hadisənin məkanının və mahiyyətinin təhrif olunması faktların saxtalaşdırılması, ictimai rəyin manipulyasiyası və auditoriyanın yanlış məlumatlandırılması cəhdidir.

“Bu telekanalın fəaliyyəti Azərbaycan əleyhinə yönəlmiş qərəzli, həqiqətə uyğun olmayan məlumatların yayılması və təxribatçı məzmun vasitəsilə ictimai rəyin çaşdırılması ilə səciyyələnir. Kanalın ölkəmizlə bağlı hadisələri sistemli şəkildə təhrif etməsi, dezinformasiya xarakterli materiallara mütəmadi yer verməsi və Azərbaycan haqqında mənfi təsəvvür formalaşdırmağa yönəlmiş yanaşması bu fəaliyyətin onun informasiya siyasətinin əsas istiqaməti olduğunu göstərir”, - açıqlamada qeyd olunub.

Şura bildirib ki, kanal məhz bu cür ardıcıl və qərəzli fəaliyyətinə görə qara siyahıya daxil edilib.

Qurum media subyektlərini məlumat yayarkən faktların dəqiqliyini və obyektivliyini təmin etməyə, hadisələrin mahiyyətini təhrif edən təqdimatlardan çəkinməyə çağırıb. İctimaiyyətə isə bu cür paylaşımlara tənqidi yanaşmaq, məlumatları etibarlı mənbələr əsasında yoxlamaq və dezinformasiyanın yayılmasına şərait yaratmamaq tövsiyə olunub.