Azərbaycanın ilk qadın snayperi Növrəstə Yusifova vəfat edib

Birinci Qarabağ müharibəsinin iştirakçısı, Azərbaycan ordusunun ilk qadın snayperi Növrəstə Yusifova 74 yaşında Bakıda vəfat edib.

Bu barədə onun yaxınları məlumat yayıblar. Veteran hərbçinin xəstəlik səbəbindən dünyasını dəyişdiyi bildirilib.

Qeyd edək ki, Növrəstə Yusifova sovet illərində Bakıda qülləli kran maşinisti kimi çalışıb və Azərbaycanın 7-ci dərəcəli ilk qadın maşinisti olub.

O, atıcılıq idmanı üzrə 1974-cü ildə Azərbaycan çempionatında ikinci, 1975-ci ildə isə birinci yeri tutub.

Yusifova 17 mart 1992-ci ildə ilk qadın snayper kimi orduda qeydiyyata alınıb. 1992–1994-cü illərdə Birinci Qarabağ müharibəsində snayper kimi iştirak edib.

Hərbçilər arasında “Xalaqızı” ləqəbi ilə tanınan Növrəstə Yusifova 1997-ci ildən Qarabağ Əlilləri və Veteranları Cəmiyyətinin sədri idi.