Astarada fizika müəllimi polisin qanuni tələbinə tabe olmadığı üçün həbs edilib

Astaranın Kijəbə qəsəbəsində yaşayan kənd məktəbinin fizika müəllimi polisin qanuni tələbinə tabe olmadığı üçün 30 gün müddətinə inzibati qaydada həbs edilib.

Astara Rayon Məhkəməsində hakim Emin Quliyevin sədrliyi ilə keçirilən iclasda İnzibati Xətalar Məcəlləsinin 535.1-ci maddəsi ilə təqsirləndirilən V.H. barəsində tərtib edilmiş protokola baxılıb.

Məhkəmə materiallarına əsasən, oktyabrın 13-də polis əməkdaşları daxil olmuş müraciətlə bağlı izahat almaq üçün Kijəbə qəsəbəsinin sakininə yaxınlaşaraq onu polis şöbəsinə dəvət ediblər. Lakin həmin şəxs nalayiq ifadələr işlədib, ictimai qaydanı pozub və polislərlə getməkdən imtina edib. Xəbərdarlıqlara baxmayaraq, o, polis əməkdaşlarının qanuni tələblərinə tabe olmayıb.

Məhkəmə iclasında V.H. əməlini etiraf edərək bildirib ki, polis şöbəsinə dəvət olunarkən əsəbiləşib və buna görə mübahisə yaradıb. Kənd məktəbində fizika müəllimi işlədiyini deyən şəxs törətdiyinə görə peşman olduğunu bildirib və məhkəmədən yüngüllük göstərilməsini xahiş edib.

Məhkəmənin qərarı ilə ona 30 gün müddətinə inzibati həbs tənbehi tətbiq olunub.

Tatyana