İlham Əliyev Çinin xarici işlər nazirini qəbul edib

Azərbaycan Prezidenti İlham Əliyev oktyabrın 14-də Çin Kommunist Partiyası Mərkəzi Komitəsinin Siyasi Bürosunun üzvü, Çinin xarici işlər naziri Vanq Yini qəbul edib.

Görüşdə İlham Əliyev Çinə dövlət səfərini, sədr Si Cinpinlə görüşlərini və səfər çərçivəsində iki ölkənin strateji tərəfdaşlığına dair Birgə Bəyanatın qəbul edilməsini məmnunluqla xatırladıb. O, bu sənədin ikitərəfli münasibətləri yeni səviyyəyə yüksəltdiyini bildirib.

Vanq Yi Çinin Sədri Si Cinpinin salamlarını dövlət başçısına çatdırıb. İlham Əliyev salamlarına görə minnətdarlığını bildirərək, öz salamlarını da Si Cinpinə çatdırmağı xahiş edib.

Çinli nazir iki ölkənin strateji tərəfdaşlığına dair Birgə Bəyanatın əhəmiyyətini vurğulayaraq, Çinin Azərbaycan üçün etibarlı və uzunmüddətli tərəfdaş olduğunu qeyd edib.

Vanq Yi Bakıda müşahidə etdiyi inkişaf proseslərinin onda dərin təəssürat yaratdığını bildirib, Azərbaycanın Prezident İlham Əliyevin rəhbərliyi ilə dinamik inkişafını vurğulayıb. O, Çinin Azərbaycanın yaxın dostu kimi bu uğurlara sevindiyini deyib.

Nazir Çinin Azərbaycanın ərazi bütövlüyünü və suverenliyini daim dəstəklədiyini, ölkənin beynəlxalq və regional məsələlərdə artan rolunu qeyd edib. O, həmçinin Azərbaycanın Asiyada Qarşılıqlı Fəaliyyət və Etimad Tədbirləri üzrə Müşavirəyə (AQEM) sədrliyi və təşkilatın Zirvə Görüşünə ev sahibliyi etməsi münasibətilə təbriklərini çatdırıb.

İlham Əliyev xoş sözlərə görə minnətdarlığını bildirərək, Çinin dinamik inkişafını yüksək qiymətləndirib. O, Azərbaycanın Çinin Qlobal Cənubun maraqlarının təmsil olunmasına və davamlı inkişafa verdiyi töhfələri yüksək qiymətləndirdiyini bildirib.

Dövlət başçısı Azərbaycanın "Vahid Çin" siyasətini daim dəstəklədiyini vurğulayıb, "Bir kəmər, bir yol" təşəbbüsünün əhəmiyyətini qeyd edib və Azərbaycanın bu layihəyə dəstək verən ilk ölkələrdən biri olduğunu xatırladıb.

Orta Dəhlizin dinamik inkişaf etdiyini bildirən İlham Əliyev bu istiqamətdə Azərbaycanla Çin arasında əməkdaşlıq üçün geniş imkanların olduğunu deyib. Vanq Yi Azərbaycanın Orta Dəhlizdə mühüm mövqeyə malik olduğunu vurğulayıb.

Prezident iqtisadi-ticari əlaqələrin siyasi münasibətlərə uyğun olaraq fəal inkişaf etdiyini bildirib və Çin şirkətlərinin Azərbaycandakı müxtəlif investisiya layihələrində iştirakını qeyd edib.

Görüşdə bərpaolunan enerji sahəsində əməkdaşlıq, eləcə də separatizm, ekstremizm və radikalizmə qarşı mübarizədə iki ölkənin qarşılıqlı fəaliyyəti müzakirə olunub.