İlham Əliyev İsrail Prezidenti ilə görüşüb

Oktyabrın 14-də Azərbaycan Prezidenti İlham Əliyev İsrail Prezidenti İsxak Hersoq ilə görüşüb.

Görüşdə Azərbaycanın Asiyada Qarşılıqlı Fəaliyyət və Etimad Tədbirləri üzrə Müşavirəyə (AQEM) sədrliyi və Azərbaycan-İsrail münasibətləri müzakirə olunub.

İsxak Hersoq Azərbaycanın AQEM-ə sədrliyi münasibətilə İlham Əliyevi təbrik edib. O, Azərbaycanın 2026–2028-ci illərdə də quruma sədrlik etməsini ölkəyə göstərilən yüksək etimadın ifadəsi kimi qiymətləndirib.

İsrail Prezidenti Azərbaycanın sədrliyi dövründə AQEM çərçivəsində praktiki əməkdaşlığın genişləndirilməsi və etimad quruculuğu tədbirlərinin gücləndirilməsi istiqamətində görülən işləri yüksək qiymətləndirib.

İlham Əliyev Azərbaycanın sədrliyinə verilən qiymətə görə təşəkkür edib. O, Azərbaycanın AQEM-ə üzv dövlətlər arasında qarşılıqlı etimadın möhkəmləndirilməsi və praktiki əməkdaşlığın inkişaf etdirilməsi istiqamətində səylərini davam etdirdiyini bildirib.

Görüşdə, həmçinin Azərbaycan-İsrail münasibətləri, eləcə də beynəlxalq və regional gündəlikdəki məsələlər ətrafında fikir mübadiləsi aparılıb.