Əli Həsənov: "Qərb mediası müsəlmanları terrorçu kimi təqdim edir"

"Düşünürəm ki, müsəlman ölkələrində jurnalistlər birləşə və ortaq mövqe nümayiş etdirə bilərlər”.

ANN.Az APA-ya istinadən xəbər verir ki, bunu Azərbaycan Prezidenti Administrasiyasının ictimai-siyasi məsələlər şöbəsinin müdiri Əli Həsənov İRNA-ya açıqlamasında deyib.

Tehranda keçirilən İslam ölkələrinin informasiya nazirlərinin 10-cu iclasında iştirak edən Ə. Həsənov iclasda müsəlman ölkələrinin bu məsələdə ortaq məxrəcə gələcəklərinə ümidini ifadə edib: "Müsəlman ölkələrindəki jurnalistlər düzgün, obyektiv informasiya yaymaqla, İslam ölkələrinin məqsədlərinə çatmasında yardımçı ola bilərlər. Müasir dövrdə informasiyanın doğru-dürüst çatdırılması əsas amildir”.

Şöbə müdiri bildirib ki, Qərb mediası bu gün müsəlmanları bir sıra hallarda terrorçu kimi təqdim edir: "Bunun nümunəsini Suriya, Misir və İraqda görürük. İnsanlara həqiqətləri çatdırmaq lazımdır. Ümid edirəm ki, bu iclas İslam dünyası KİV-i arasında həmrəyliyin güclənməsinə, onların vahid koordinasiya mərkəzinin yaradılmasına yardımçı olacaq”.

Qeyd edək ki, bu gün Tehranda İslam ölkələrinin informasiya nazirlərinin 10-cu iclası başlayıb. İki gün davam edəcək iclasa 57 müsəlman ölkəsindən nümayəndə qatılıb. İclas "İslam dünyasında sülh və sabitliyin təmini üçün KİV-in yaxınlaşması” adı altında keçirilir.

ANN.Az