Bu gündən sığortalıların cərimələrindən toplanan vəsaitin 43 faizi işçilərə xərclənəcək

Prezident İlham Əliyev istehsalatda bədbəxt hadisələr və peşə xəstəlikləri ilə bağlı icbari sığorta haqqında qanuna dəyişiklikləri təsdiqləyib. Dəyişikliklərə əsasən, dövlət orqanlarında, bələdiyyələrdə, dövlət payının nəzarət zərfinə malik olduğu qurumlarda, publik hüquqi şəxslərdə və büdcə təşkilatlarında çalışanlar, həmçinin istehsalat təcrübəsi keçən tələbə və şagirdlər, könüllülər müvafiq icra hakimiyyəti orqanının müəyyən etdiyi qurumda icbari sığortalanacaq.

Digər sığortalılar, o cümlədən fərdi sahibkarlar və özəl sektorda çalışanlar yerli hüquqi şəxslər vasitəsilə sığortalanacaq. Sığorta ödənişlərinin məbləği və verilmə qaydası, eləcə də uçot mexanizmi müvafiq qurum tərəfindən müəyyən ediləcək.

Sığorta vəsaitləri sığorta haqları, depozit gəlirləri və digər mənbələr hesabına formalaşacaq. Bu vəsaitlər sığorta ödənişlərinə, Dövlət Əməyin Mühafizəsi Fonduna ayırmalara, sosial müdafiə tədbirlərinə, ehtiyat fonduna və idarəetmə xərclərinə yönəldiləcək. Fond ayırmaları sığorta haqlarının 10%-i, idarəetmə xərcləri isə 5%-dək müəyyən edilib.

Dəyişikliklər 2026-cı il yanvarın 1-dən qüvvədədir.