Rivaldo Pelenin oğlunu qovdu

Braziliya futbolunun canlı əfsanəsi Pelenin oğlu Edinyo baş məşqçisi olduğu "Moji-Mirim" klubundan qovulub.

Qol.Az-ın "The Washington Times"a istinadən verdiyi məlumata görə, 44 yaşlı mütəxəssis Braziliya ikinci liqasının son turunda "Oeste" ilə oyundan sonra (0:0) istefaya göndərilib.

Bu barədə qərarı klubun prezidenti Rivaldo verib. Komandasının son nəticələrindən narazı qalan Braziliya millisinin sabiq futbolçusu baş məşqçi Edinyo ilə yolları ayırmaq qərarına gəlib.

Qeyd edək ki, Edinyo 90-cı illərdə "Santos"da çıxış edib. O, karyerasını başa vurduqdan sonra "Santos"da əvvəlcə qapıçılar üzrə məşqçi, daha sonra baş məşqçi köməkçisi vəzifəsində işləyib. Bu ilin aprel ayından "Moji-Mirim"i çalışdıran Edinyo 2006-cı ildə narkotik ticarətində və çirkli pulların yuyulmasında təqsirli bilinərək həbs olunub.