Rəsulzadənin məzarı ziyarət olunacaq

“Azərbaycan Xalq Cümhuriyyət tarixinin bir çox səhifələri var ki, Məhəmməd Əmin Rəsulzadənin 130 illiyi ilə əlaqədar onlar dərindən araşdırılmalıdır”.APA-nın xəbərinə görə, bunu Azərbaycan Milli Elmlər Akademiyasının (AMEA) Tarix İnstitutunun direktoru Yaqub Mahmudov jurnalistlərə açıqlamasında deyib. Onun sözlərinə görə, cümhuriyyət tarixinin öyrənilməsinə dair Dehli, Paris, Moskva, Sankt-Peterburq, London, İstanbul və Ankaradan xeyli sənədlər gətirilib: “Bu sənədlər cümhuriyyət tarixini öyrənmək üçün tarix qarşısında yeni səhifələr açır. Cümhuriyyətin tarixi ilə bağlı bir çox məsələlərə yenidən baxmaq lazımdır. Təəssüf ki, bu günə kimi Azərbaycan Xalq Cümhuriyyətinin şimal qonşuları ilə tarixi araşdırılmayıb. Cümhuriyyət elan olunan səhəri gündən Moskvada ermənilər birləşərək bu dövləti qan içində boğmaq üçün planlar hazırlayıb. Bununla bağlı Ukraynada xeyli sənəd ehtiyatı var və hazırda orada onların təhlili istiqamətdə iş aparılır. Bundan əlavə, cümhuriyyətin Mərkəzi Asiya ölkələri ilə əlaqələrini araşdırmalıyıq”. Y.Mahmudov qeyd edib ki, Məhəmməd Əmin Rəsulzadə Azərbaycan xalqının istiqlal çağırışında xüsusi rol oynayan, bundan sonra da öyrəniləsi bir tarixi şəxsiyyətdir. Onun sözlərinə görə, prezident İlham Əliyevin Məhəmməd Əmin Rəsulzadənin 130 illik yubileyinin keçirilməsi haqqında sərəncamından sonra ölkədə çox ciddi işlər görülür: “İlk dəfə AMEA-nın Tarix İnstitutunda Azərbaycan Xalq Cümhuriyyətinin tarixini öyrənən şöbə yaradılıb. Bu, cümhuriyyət dövrünə çox böyük töhfədir. Bundan əlavə, arxivdə böyük işlər gedir. Heydər Əliyevin göstərişi ilə hazırlanan 2 cildlik “Azərbaycan Xalq Cümhuriyyəti Ensiklopediyası”nın təkmilləşdirilməsi istiqamətində işlər gedir və bu yaxınlarda ensiklopediya kütləvi tirajla çap olunacaq. Yanvarın 31-də Azərbaycandan dövlət nümayəndə heyətinin iştirakı ilə Məhəmməd Əmin Rəsulzadənin qəbiri ziyarət ediləcək”.ANN.Az