Bu sözləri Axar.az-a açıqlamasında politoloq Tofiq Abbasov deyib. Rusiyanın fonunda Suriyanın Avrasiya İttifaqına qoşulma məsələsini şərh edən politoloq iki ölkə arasında güclü bir yaxınlaşmanın ola biləcəyindən söz açıb:

 

"Rusiya keçmiş SSRİ-nin varisidir və bu iki dövlətin uzun sürən müttəfiqlik tarixi var. Ötən əsrin ikinci yarısından bəri Moskvanın Dəməşqlə çoxşaxəli əlaqələr qurduğunu bilirik. Soyuq müharibə bitdikdən sonra bir çox alyans və müttəfiqlik əlaqələri də çöküb. Xüsusən də Rusiya ən çox itirən tərəf olub. Qərb bu işdən hər zaman geosiyasi məkanda yararlanmağa çalışıb. Təbii ki, Vaşinqton bu prosesi xeyrinə dəyişə bilib. Rusiya indi yaranan bu boşluqları doldurmağa çalışır. Suriyanın Tartus limanında Rusiyanın hərbi bazası hələ də durur. Moskva da Yaxın Şərqdə itirilmiş mövqelərini ona görə bərpa etməyə çalışır ki, həmin vacib bölgədən tam çıxarılmasın. Kremlin əlindəki yeganə kart - Bəşər Əsədin hakimiyyəti - Moskavaya bu imkanı vəd edir. Rəsmi Moskva İŞİD-in Rusiyanı hədəf almasını bilir və həmin qondarma dövlətin səylərini zərərsizləşdirməkdən ötrü qaynar bölgədə müqavimət səddi qurmağa çalışır. Buna görə də Dəməşqin Rusiya ətrafında hər hansı bloka qatılması hər iki tərəfə güclü bir yaxınlaşmanı reallaşdırmaqdan ötrü platforma verə biləcək”.

 

Qeyd edək ki, Suriya Avrasiya İttifaqı ilə azad iqtisadi zonanın yaradılması haqqında müqaviləni imzalamaq niyyətindədir.